New Delhi, August 28 : Excel Entertainment para taikhan laga nutun film ‘Yudhra’ nimitey Siddhant Chaturvedi ke shaktishali Yudhra aro Malavika Mohanan ke Nikhat laga role te introduce kora picheytey etya taikhan para Raghav Juyal tu khatarnak ‘Shafiq’ laga role kuribole asey koikina reveal kurisey. Nutun release huwa motion video para Siddhant aro Raghav laga majotey damdar larayi huwa tu sabole laga iccha baraidisey. Nutun ola motion video te, etu film laga bari te aro gehrayi para dikhaisey, kuntu te Yudhra aro Shafiq majotey ekta jordar aamna-samna huwa dikhaisey. Raghav para villain Shafiq laga role kora tu shaktishali asey, kuntu para ekta dangor larayi jhagra nimitey stage khara kuridisey.
Etu film te etu duita character(Yudhra aro Shafiq) tu kinaka clash hobole asey etu sabole interesting hobo. Etu film laga motion video ola para agey barikina etu film laga trailer nimitey josh tu aro baraidisey. Etu trailer tu August 29 te release hobole asey. Etu film para fan khan majotey eman josh jagaidikina asey. Etu film laga poster ola homoi para etu film sabole laga iccha tu bari thakisey. Hoilebi Raghav Juyal ke etu film laga villain Shafiq laga roop te introduce kora picheyte josh tu aro bisi barikina nutun ucchayi ke chuisey.
Etu film(Yudhra) tu Ritesh Sidhwani aro Farhan Akhtar laga Excel Entertainment para olai asey. Etu film ke Ravi Udyawar para direct kurisey aro September 20 te theatre te release hobole asey.
Add Comment