Kartik Aryan aro Triptii Dimri tu Anurag Basu laga next film nimitey aro ekbar eksath ahibole

New Delhi, September 15 : Film laga bari te khobor rakha manu khan tu Kartik Aaryan aro Triptii Dimri laga eksath kora first film ‘Bhool Bhulaiyaa 3’ nimitey besabiri para rukhi asey. Hoilebi yatey aro ekta dangor news asey- etu duijun tu aro ekta dusra film te bi eksath kaam kuribole asey. Taikhan duijun tu Anurag Basu para direct kora ekta gana nimitey eksath ahibole asey kuntu laga title tu etya diyanai. Taikhan duijun laga nutun film tu ekta love story hobole asey kuntu ke Bhushan Kumar para produce kuri asey. Etu film laga shooting tu Mumbai te September 24 te suru hobole asey.  Juwa olop hapta te etu film laga kunba script reading session already hoijaisey. Aro etya Kartik Aryan tu Anurag Basu nimitey ekta love boy laga topi pindibole tayar asey. Etu romantic film laga music tu Pritam para compose kuribole asey. Etu film tu India laga alag alag location te shoot kuribole asey. Etu saal laga September moina para loikina aha saal laga February moina tak. Etu film laga makers khan para etu film tu 2025 khotom hobole ageyte release kuribole aim kuri asey. Kartik Aryan aro Triptii Dimri laga film Bhool Bhulaiyaa 3 tu November 1 te release hobole asey. Kartik ke akhri baar ‘Chandu Champion’ film te dikhisiley.