New Delhi, 23 November : IPL agey te tin season laga tarikh announce kuri dise, first time karne.
2025 season March 14 para May 25 tak jabole ase, 2026 season March 15 para May 31 tak, aru 2027 season March 14 para May 30 tak jabole ase. IPL laga email te franchises khan ke “windows” koi dise, hoilebi itu tarikh final hoi jabo laga chance ase.
2025 season te 74 matches hobo, juntu last tin season te bi same thakise. Hoilebi, IPL laga 2022 media rights document hesapte, 2023-27 cycle karne 2025 aru 2026 te 84 matches aru 2027 te maximum 94 matches rakhibole plan thakise.
Report hesaap te, bishi Full Member nations laga overseas khiladi khan itu laga board para tin saal karne IPL te khelibole approval pai loise. Hoilebi, Pakistan laga khiladi absent thakibo, karon political tensions nimite 2008 te inaugural season para IPL te khelianai.
IPL 2025 agey te, November 24 aru 25 te Jeddah, Saudi Arabia te hobo mega auction karne total 574 khiladi shortlist hoi ase. Itu khiladi majote 366 Indian aru 208 overseas khiladi ase, juntu majote 3 khiladi associate nations para ahise. Itu auction te 318 Indian uncapped khiladi aru 12 uncapped overseas khiladi rakhi ase.
Total 204 slots available ase, aru 70 overseas khiladi karne ase. Reserve price highest Rs. 2 crore ase, aru 81 khiladi itu highest bracket te thakibo.
Add Comment