New Delhi: Los Angeles te jui laga para United States laga California state te boha bisi manu laga jibon ke affect kurisey. Oscars 2025 nominations laga tarik bi aro ekbar postpone hoisey. Aro etu bar, original tarik para ek-hapta maan postpone hoijaisey. Academy of Motion Picture Arts and Sciences laga latest report hisap te, etu nominations tu etya January 23 te announce hobole asey.
Etu Academy laga CEO Bill Kramer aro President Janet Yang para milikina diya ekta statement te koisey, “Amikhan sob bi etu jui laga impact para aro amikhan laga community te bisi manu khan para barbadi experience kora para bisi monduk hoikina asey. Etu academy tu film industry bhitor te ekta unifying(eksath anidiya) force hoikina ahiasey aro amikhan tu dukh-diktar homoitey ekey logotey khara kuribole committed asey.”
Los Angeles area te jui etya tak bi active thaka nimitey, etu film academy para etu laga members khan nimitey nominations voting period bi Friday taak baraidisey. Asol te, nomination tu utu din laga phujur te announce hobole thakisey.
Oscar organise kora organization para hodai saal nominee khan logotey lunch kora laga programme bi cancel kuribole faisla kurisey. Etu tu TV te nidikha event asey. Scientific and Technical Awards, kuntu February 18 te hobole thakisey, etu laga tarik bi change kuribole asey.
Etu 97th Oscars event tu March 2 te Dolby Theatre te hobole asey. Etu event tu TV te 7pm para ABC channel te live dikhabole asey aro Hulu te live stream kuribole asey.
Add Comment