New Delhi, January 18: Prime Minister Narendra Modi para Saturday din te SVAMITVA Scheme under te 50,000 opor busti khan te matimalik khan ke 65 lakh opor property card bhak kurisey. Etu busti khan tu 10ta state aro duita union territory te 230 opor district te asey.
PM Modi para Ahmedabad te huwa etu event te virtually address kurisey aro etu subidha pa manu khan logotey bi baat-chit kurisey. BJP national president aro union minister JP Nadda bi etu event te mojud thakisey.
Etu scheme tu April 24, 2020 te National Panchayati Raj Day te PM Modi para launch kurisiley. Etu scheme tu dur aro bhitor area khan te mati thaka manu khan ke drone aro GIS technology cholaikina “Record of Rights” dibole launch kurisiley.
Etu event te PM Modi para bhasan diya homoitey koisey, “Aji tu desh laga busti khan nimitey aro desh laga rural economy nimitey ekta bisi etihasik din asey. Aji 65 lakh card bhak joija picheyte busti laga 2.24 crore maan manu khan logotey etya Svamitva property card thakibole asey.”
Etu scheme laga importance laga bari te kotha kurikina PM Modi para koisey, “Amikhan ke sob laga development aro biswas lagey, aro etu nimitey amikhan para SVAMITVA scheme launch kurisey. Amikhan para faisla kurisey ki drone laga modod para amikhan sob busti te thaka ghor laga zameen laga naksa banabo. Busti manukhan para taikhan laga property laga documents pabo. “
PM Modi para ageybarikina koisey, “Aji, jitya amikhan etu scheme laga benefits ke sai asey, amikhan ke ekta satisfaction pai ki amikhan busti aro gorib manu khan ke seva kuribole pariasey. Etu subidha pa manu khan laga chehra te khusi, mon pura hoikina thaka aro atmabiswas thaka dikhibole pa tu hosa bi monkhusi koraidiya laga asey. Aminimitey etu tu ekta dangor asirvad asey.”
Add Comment