New Delhi, January 31: Pop singer Taylor Swift ke February 2 te hobole thaka 67th Grammy Awards te presenter confirm kurisey koikina Record Academy para Thursday din te announce kurisey.
Tai para kuntu category laga award present kuribole asey etu etya tak bi announce huwanai. Taylor Swift laga eleventh album ‘The Tortured Poets Department’ bi etu saal 6ta category te nominate hoikina asey.
Taylor tu album of the year nimitey nominate hoikina asey aro judi tai para juwa saal tailaga tenth album ‘Midnights’ jitya picheyte set kora record bhangaikina fifth bar etu(album of the year) title jitisey koiley tai etihas banabo paribo.
Etu singer tu 67th Grammy Award te Best Pop Vocal Album, Record of the Year, Song of the Year, Best Music Video aro Best Pop Duo/Group Performance(Gracie Adams logotey) nimitey bi nominate hoisey.
Taylor, kun etya duniya laga top singers majotey ekta asey, tai tu Grammys te 4bar Album of the Year award jitisey. Etu award khan tu tailaga album Midnights, Folklore, 1989 aro Fearless nimitey jitisiley. 3ta Grammy te tu tai Frank Sinatra, Stevie Wonder aro Paul Simon logotey tie hoisey. Hoilebi tai sobsey bisi Album Of The Year trophy jita laga record dhurikina asey.
Etu saal, Album of the Year category te Beyonce laga Cowboy Carter, Sabrina Carpenter laga Short and Sweet aro Billie Eilish laga Hit Me Hard and Soft logotey compete kuribole asey.
Add Comment