New Delhi, February 01: Saturday din te 8jun Aam Aadmi Party (AAP) MLA taikhan laga party para resign kuriluwa picheyte Bharatiya Janata Party (BJP) join kurikina AAP ke February 5 te hobole thaka election nimitey tayari kurithaka homoitey ekta nutun jhatka disey.
Etu 8jun AAP MLA para resign kora tu, taikhan ke ahibole thaka election te contest kuribole ticket nidiya nimitey asey.
Resignation letter te, taikhan para AAP ke taikhan laga transparency(khula-khuli aro imandar huwa) aro corruption-mukt governance laga ideal para dur hoijaisey koikina accuse kurisey.
Taikhan para koisey ki etu party(AAP) tu ekjun para control kora aro faisla luwa, khula-khuli nathaka aro party bhitor te azadi nathaka laga hoijaisey.
Resign kora AAP MLA majotey Naresh Yadav (Mehrauli para), Rohit Kumar (Trilokpuri), Madan Lal (Kasturba Nagar), Rajesh Rishi (Janakpuri), Bhavna Gaud (Palam), Bhupinder Singh Joon (Bijwasan), Pawan Kumar Sharma(Adarsh Nagar) aro Girish Soni (Madipur) thakisey.
Madan Lal aro Bhavna Gaud para koisey ki taikhan tu AAP aro etu party laga leader Arvind Kejriwal opor te biswas haraijaisey. Rohit Kumar, kun para Dalit khan bhorta thaka Trilokpuri jaga ke represent kuri thakisey, tai para AAP ke vote pabole nimitey Dalit/Valmiki community laga istamal kurisey aro contractual employment khotom kuridiya aro temporary workers khan ke regular kuridiya nisna kosom kha tu pura kuribole paranai koikina accuse kurisey.
Naresh Yadav, kun ekta homoitey AAP laga tagra supporter thakisey, tai para party bhitor te members khan laga awas dabaidiya opor te mondukh jataisey. Rajesh Rishi para etu party ke transparency aro jawab diya-baji kora laga commitment para dur hoijaisey koikina accuse kurisey..
Pawan Kumar Sharma para koisey ki etu party tu taikhan kuntu imandar ideology para form hoisiley, etu para dur hoijaisey.
Add Comment