Mumbai, March 05: Neil Nitin Mukesh, kun New York, Johnny Gaddaar, 7 Khoon Maaf, Prem Ratan Dhan Payo aro dusra mashoor film khan te thakisey, tai para ekta interview te koisey ki tai tu etyatak bi kaam pabole dukh pai asey aro bhal opportunity bisarikina casting director khan ke message kuri thakey.
Neil para Bollywood laga sob actor khan kinaka lagatar bhal opportunity bisari thakey etu laga bari te koisey. Tai para acknowledge kurisey ki film bana tu etya ekta business hoisey hoilebi etu te jor disey ki film te poisa invest kora tu return pabo na nai tai etu guarantee dibole napara para tailaga successful film dibo para laga kabiliyat ke khotom nokorey. Tai para koisey ki film success banabole nimitey bhal role aro sahi manu laga support lagey.
Neil para koisey ki Bollwood te 20 years kaam kora laga bawajut, sob film picheyte tai ekta bhal opportunity bisara laga process tu wapas suru kuribole lagijai.
Tai para enaka koisey, “Ami etyatak bi manu khan ke message kurikina kaam mangey. Taikhan logalog reply kurikina enaka koi, ‘Hoi, Neil, amikhan apnike yaad kurikina judi kiba-kibi hoisey koiley janaidibo.’ Taikhan ke ami zinda asey koikina yaad dilabole laga duty tu amilaga asey. Jitya ami first film kurisey, khali kunba newcomers khan ke hey hodai dui-teen saal te launch kuri thakisey. Hoilebi etya, newcomer ke hodai hapta launch korey. Aro enaka hoikina, apni tu ekta option hoikina thakijai.”
Add Comment