Bhubaneswar, 6 March : Super Cup 2025, juntu India laga yearly premier football cup competition ase, April 21 para Bhubaneswar, Odisha te khel hobole ase, itu laga khobor All India Football Federation Wednesday din announce kuri dise.
Itu 16-team premier club competition knock-out format te khel hobole ase, juntu ager saal khan te group stage pichete knockout format thakise, itu te alag ase. Itu tournament laga panchta edition te, 13 ta Indian Super League (ISL) club aru 3 ta I-League club participants thakibo.
Ager din te itu tournament laga winner AFC (Asian Football Confederation) Cup te spot pai thakise, kintu ahibo thaka saal para 2025-26 AFC Champions League 2 (ACL2) Playoffs te kheli bole moka pabole ase, juntu Indian clubs khan ke continental stage te nijor position dangor kuri bole moka dibo.
Super Cup Federation Cup laga successor ase, aru 2018 para shuru hoise. Last char ta edition para tinta Bhubaneswar te khel hoise. Bengaluru FC 2018 te inaugural edition jitise, aru next saal FC Goa jitise. Odisha FC 2023 te, tinta saal laga break pichete itu trophy jitse.
2024 edition te, juntu Kalinga Super Cup hisab te jana jaise, East Bengal laga 12 saal laga struggle khotom kuri first silverware jitise. Itu final match te, Odisha FC ke 3-2 para harai dise, extra time pichete, Kalinga Stadium, Bhubaneswar te.
2024-25 ISL season te sirf duita hafta laga game baki thaka time te, itu Super Cup ISL laga playoffs pichete khel hobole ase.
Itu tournament hobo nohoi koi confirm kuribo deri hoise, aru itu karone organisers khan opor beshi criticism ahise. India aru FC Goa laga head coach, Manolo Marquez, bhi koi dise ki desh itu aspect te improve kuribo lage.
Add Comment