New Delhi, 5 April : Sports Ministry etiya 10 centre ke upgrade koribo Olympic Training Centres te, juntu plan India laga top athletes khan ke Summer Games karone prepare koribole banai ase. Itu plan 2036 Olympics laga target rakhikene banai dise.
Programme hisab te, itu training centres khan ek-ekta sports logot dedicate hobo. Around 150 jon athlete ke etu centres te lobo, juntu te modern training facilities aru best expert trainers thakibo.
Eitu centres khan alag hobo National Centre of Excellence (NCOE) pora, juntu te young talents train kore. Plan hisab te, Khelo India programme laga under te district aru block level pora talent scout kora hobo, aru itu talents khan ke chutu centres te training diya hobo, juntu pora NCOE aru Olympic Training Centre te loi jabo, jiman tai international level te aage jabole pare.
Development logot jura thaka manu khan laga hisab te, main focus hobo grassroots pora talent identify kora.
Indian Olympic Association (IOA) International Olympic Committee (IOC) ke ekta Letter of Intent pathaise 2036 Olympics host koribole laga interest janai kene, aru medal tally improve kora bhi etu karone important hobo.
Khelo India Youth Games 2025 laga seventh edition Bihar te May 4 pora 15 tak hobo, itu Sports Minister Mansukh Mandaviya janai dise. Etu games Bihar laga paanchta city—Patna, Rajgir, Gaya, Bhagalpur aru Begusarai te hobo. Shooting, Gymnastics aru Cycling laga track events Delhi te organize kora hobo. Total 28ta sports te competition hobo, aru E-Sports ke demonstration sport hisab te include kora hoise.
Khelo India programme bhi expand kora jaise, juntu te alag-alag games include kora hobo—KI North East Games, KI Tribal Games, KI School Games aru etu laga logot aru bhi games thakibo.
Add Comment