Taipei, 7 May : India laga star shuttler Kidambi Srikanth bhal sur te tournament shuru koriseh, ekta straight game te jit paiki second round te punchi geseh. World No. 61 Srikanth, jun ekta lamba time se form kharap thaki struggle kori ase, fellow Indian aru 2022 World Junior Championships laga silver medallist Sankar Subramanian ke 21-16, 21-15 te haraiseh.
32 saal laga Srikanth, jun 2021 World Championships te silver medal jitiseh, next round te aru ekjon Indian player Ayush Shetty logot mukabla koribo. Ayush, jun 2023 World Junior Championships te bronze medal jitiseh, third seed aru world No. 13 Lee Chia Hao (Chinese Taipei) ke 21-17, 21-18 te harai diseh. Lee March mahina te All England Championships laga runner-up thakiseh.
2023 National Games gold medallist Tharun Mannepalli bhi ekta tough match te Japan laga Shogo Ogawa ke 21-17, 19-21, 21-12 te harai diseh aru next round te Indonesia laga Moh. Zaki Ubaidillah logot kheli bo.
Meiraba Luwang Maisnam kintu first round te Canada laga Brian Yang logot 21-23, 12-21 te harigeseh.
Women’s singles te, Unnati Hooda — jun 2022 Odisha Masters aru 2023 Abu Dhabi Masters jitiseh — India laga Anupama Upadhyaya ke 21-13, 21-17 te haraiki second round te punchiseh. Next match te tai Taipei laga Lin Sih Yun logot mukabla koribo.
Aakarshi Kashyap kintu first round te bhal performance na dikhai, Taipei laga Hung Yi-Ting logot 9-21, 12-21 te ekdom one-sided match te harigeseh.
Anmol Kharb aru Rakshitha Sree Santhosh Ramraj laga match aji rati khelibo.
Add Comment