Dibrugarh, February 18 : Assam laga dangor higher education institute Dibrugarh University tu Pradhan Mantri Uchchatar Shiksha Abhiyan (PM-USHA) scheme laga under te Rs 100 crore poisa laga grant paisey. Etu tu etu University ke ekta multi-disciplinary education and research university (MERU) banabole nimitey ekta dangor kadam asey.
Etu khobor ke social media te announce kurikina, Assam Education Minister Ranoj Pegu para tailaga khusi janaikina enaka koisey, “ Dibrugarh University ke NEP laga under te MERU te develop kuridibole nimitey chunisey. Etu university para Rs 100 crore laga grant pabole asey. Etu opor te, Cotton University aro Bodoland University para bi University Strengthening grants laga under te Rs 20 crore poisa pabole asey.
Dibrugarh University laga official Facebook page te khusi jataikina enaka post kurisey, “ Dibrugarh University tu PM-USHA laga under te MERU nimitey select hoikina ekdam khusi aro josh te asey. Amikhan para Central Government aro Assam laga Government ke amikhan ke ekta multi-disciplinary education aro research university banabole nimitey enaka support diya karney mon bhitor para dhanyabad janai asey. “
1965 te khula, Dibrugarh University tu Assam aro pura Northeast region te second sobsey purana university asey.
Etu grant(poisa laga modod) para etu University ke taikhan para course offer kora tu barabole, research subidha ke tagra banabole aro alag alag discipline te collaborate kuribole nimitey taikhan laga hosla barabole asey. Aro enaka kurikina etu jaga laga education te aro bhal para contribute kuribole paribo.
Add Comment