Imphal, May 9 : May 3 te suru huwa gondogol nimitey Churachandpur district laga bisi alag alag relief camp te fasikina thaka 518 manu khan ke May 9 te suraksit para Imphal te pungchai disey.
Dusra fale Imphal te fasikina thaka 500 manu ke ekey din te Churanchandpur te pungchaidisey.
Etu gondogol hoikina pura ek hapta huwa pichetey fasikina thaka manu khan ke nijor laga jag ate pungchaidiya laga kaam tu Coordination Committee on Manipur Integrity (COCOMI), aro pahar laga nichetey thaka student bodies para kuki Students Organization logotey milikina kamyab para kuribole parisey. Taikhan ke charikina Assam Rifle khan para bi manu khan ke suraksit para nijor laga jag ate jabole dibole nimitey thik thak security gari khan disey. Churachandpur laga alag alag student bodies aro civil society organization ke COCOmI aro 6ta student bodies laga bich te buja buji anidiya pichetey etu manu khan ke nijor laga jag ate pungchaidiya laga kaam tu suru hoisey.
Aji kali jati laga gondogol chola pihetey Manipur laga bisi alag alag jaga laga manu khan tu suraksit jaga laga talash te relief camp te fasikina thakisey.
Etu relief camp tu Churachandpur district laga BSf-STC, Tuibong laga Mini Secretariat Complex te, IB Headquarter te aro Khuga Dam laga Assam Rifle te khulisey. Manu khan ke nijor laga jag ate pathaidiya laga furst batch tu baccha, bura-buri aro bimari manu khan ke agey priority dikina suru kurisey. Baki sob fasikina thaka manu khan ke bi phase hisap te nijor jaga te pungchaidibo.
Etu nijor jaga te pathaidiya manu khan ke taikhan laga parivar aro bisi alag alag civil society organization khan para khuman Lampak Stadium te swagat kurisey. Etu manu khan ke ilaj kuribole aro dawai khan dibole karney bi ekta health camp khulisey. Rajya laga sarkar para ghor bhangija nimitey buhibole jaga nathaka manu khan karney olop din buhibole laga ekta ghor arrange kurdisey.
