Imphal, May 9 : May 9 te official sources khan para koisey ki gondogol hoikina thaka Manipur rajya te halat olop bhal hoithaka nimitey aro eku biya ghotna huwa laga nutun report naola nimitey rajya laga pura 11 district te curfew(ghor para bahar naolabole laga adesh) hatai disey.
Manipur laga Chief minister N Biren Singh para Monday, May 8 te ekta press conference te huwa gondogol laga kotha kuwa homoitey koisey ki etu gondogol te 60 maan maan murisey aro 231 manu jokhom khaisey.
Etu gondogol huwa homoitey chor hoija hathyar laga kotha koikina Chief Minister para jankari disey ki badmash khan para pura puri 1041 hathyar chinikina loisey.
Tai para etu gondogol huwa te ekta uccha level laga investigation kuribole ailan kurisey.
Manipur laga Chief Minister para agey barikina rajya te huwa gondogol te murija manu khan ke Rs 5 lakh compensation dibole ailan kurisey.
Agey barikina rajya te Church khan ke jolaidiya laga ghotna te dhorom laga angle asey na nai koikina sawal kora te jawab dikina Chief Minister para jawab disey ki tai para etu tu kobole naparey.
Biren Singh para koisey ki tai tu etu biswas nai ki kunba manu khan para jani bujikina khas jaga ke target kurisey. Kilemaney ghor, gari aro alag sampati khan ke jolaidiya tu public laga bhir khan para asey. Aro Church ke jolaidiya bi etu sampati khan ke jolaidiya laga hisa hobo parey hoilebi tai tu hosa ki asey etu kobole naparey koisey. Aro koisey ki enquiry kora pichetey asol te ki hoisey etu safa para janibole paribo.
