Agartala, February 08 : Tripura laga Chief Minister Prof. Dr Manik Saha para Thursday din te jor dikina koisey ki etya laga Tripura government tu corruption(poisa kha) laga khilaf te laribole laga commitment te majboot hoikina khara kuri asey.
Ekta event te bhasan dikina, Dr Saha para corruption hataidibole nimitey sarkar para mondikina khula khuli kaam kora aro savdhan hoikina kaam kuri asey koikina janaisey.
Dr Saha para koisey ki taikhan tu Tripura laga guardian asey aro rajya te corruption nimitey jaga nai.
Dr. Saha para enaka koisey, “Amikhan laga government tu bisi sensitive asey. Etu sarkar tu transparent para kaam kuri asey. Amikhan laga Prime Minister Narendra Modi para hodai koi thakey ki tai tu ekta chowkidar asey. Aro amikhan bi Tripura laga chowkidar asey. Yatey corruption nimitey jaga nai. Kun manu hoilebi, amikhan laga sarkar tu corruption logotey majboot hoikina deal kuribo. Sarkar tu jarurat te thaka manu khan ke modod dikina manu khan laga biswas jitibole kosis kuri asey.”
Dr Saha para PM Modi laga kamyabi laga credit tu manu khan laga biswas aro support ke disey. Aro ahibole thaka Lok Sabha election te NDA para chola BJP party para dangor jeet hasil kuribole asey koikina predict kurisey. Tai para sarkar para election shanti para kuribole committed thaka laga kotha koisey. Aro election homoitey larayi jhagra huwa laga etihas para democratic harmony te bodli kuridiya laga bi kotha koisey.
Add Comment