Kangana Ranaut ke Y level security thishe.

September 7, 2020. Olop din agae te actress Kangana Ranaut aro Shiv Sena MP Sanjay Raut, pithor te kotha para larai koriase ahiase, etu nemite Home ministry para Ranaut ke Y level security thishe. Jaa kali, Ranaut laga baba aro didi Rangoli para Himachal Pradesh Chief Minister Jai Ram Thakur ke jamile thaka nemite security thiboli koishe. Y category pithor te security manuh 11 jun thakibo, etu oper te 1 jun nahoile 2 jun commandos aro police manuh ase. Olop din agae te Ranaut para hotishe ke, “keli Mumbai toh Pakistan-occupied-Kashmir neshina hoiase?” Tai para Amit Shah logot security deya nemite dunyabad korishe aro koishe ke, India laga chokuri kotha manikena respect kora nemite. Himachal Pradesh Chief Minister Jai Ram Thakur koishe ke, “Kangana Ranaut laga baba para police para motob lage koikena lekishe, aro tai laga didi logot be jaa kali kotha koishe. Etu nemite, Director-General of Police logot koishe aro Ranaut ke security thiboli koishe. Ami khan kotha kori ase ke, kenika desh laga bahar te security thibo, keli koile tai September 9 darik te Mumbai jaboli ase. Shiv Sena MP Sanjay Rau taro Bollywood actor Kangana Ranaut majot te kotha para larai hoikena actress para koishe ke, leader toh Maharashtra desh sob laga nahoi, etu samay Ranaut para September 9 darik te Mumbai ahiboli janai thishe. Tai para Raut ke desh laga maiki manuh ke beya koriase, etu nemite Bollywood actor para koishe ke, India laga bacha maiki khan para kotha beya kowah nemite ketai be maaff nakoribo. “Sanjay Raut ji, tumi para ami ke botnam korishe, etu para tumi laga mon janishe..Jodi ami Mumbai Police nahoile tumi ke botnam korile, tui ami Maharashtra ke insult korishe koboli naparibo. Tumi toh Maharashtra nahoi. Tui laga manuh para ami ke thamki marishe, hoilebi, ami Mumbai te September 9 darik ahibo” koikena Ranaut para etu kotha toh video te koishe aro tai laga official Twitter handle te thali thishe.