Imphal, February 13 : Chief Minister N Biren Singh para Monday din te koisiley ki ki jati aro community para hoisey koilebi, 1961 picheyte Manipur te ahikina boha manu khan ke identify kurikina rajya para bahar pathaidibo.
Chief Minister Biren Singh laga etu bayan para aji kali Myanmar para 12,000 opor refugee ke rajya te luwa tu mark kuri asey.
Etu opor te, Manipur te illegal tarika para ahikina buhithaka Chin Kuki tribe laga manu khan bi tatey document thik thak nathakikina buhi asey.
Chief Minister’s Secretariat para ekta statement issue kora te, Biren Singh para koisey ki 1961 picheyte duniya laga alag alag hisa para ahikina Manipur te boha manu khan ke identify kurikina nijor jag ate pathaidibo. 1961 tu Inner Line Permit (ILP) system laga base year asey.
CM Biren Singh para koisey ki Manipur laga indigeneous manu khan ke bisarikina olabole nimitey aro illegal para buhi thaka manu khan ke identify kuribole nimitey population commission khara kurisey.
Population commission laga member khan para ghor ghor jaikina ILP aro 1961 ke base year dhurikina etu hisap te population survey kuribo.
Tai para enaka koisey, “Population laga duita category thakibo- Indigeneous aro permanent settlers. Kun manu khan 1961 laga ageyte Manipur te ahisey, taikhan ke permanent settler nisna treat kurisey.”
State government para bi alag alag permit register kuribole nimitey, aro ILP nimitey data collection, tracking aro monitoring kuribole nimitey ILP portal register kurisey.
ILP tu ekta official travel document asey kuntu ke rajya laga sarkar para Manipur ke visit kora Indian manu khan ke rajya te olop homoi nimitey travel kuribole allowed korey.
Add Comment