Aizawl, March 11 : Mizoram te African Swine Fever (ASF) ola para gahori laga population ke ekdam bisi komti kuridisey. 2020 aro 2023 majotey 47,000 para bisi gahori etu bimar para murisey. State Animal Husbandry and Veterinary Minister C Lalsawivunga para etu number janaikina koisey ki etu homoitey Rs 132.2 crore maan poisa loss hoisey.
Opposition Mizo National Front (MNF) laga member Robert Romawia Royte para utha ekta sawal ke jawab dikina Minister LAlsawivunga para rajya laga gahori farming sector te African Swine Fever (ASF) laga dangor asar huwa tu detail te janaikina ekta written reply disey.
Minister Lalsawivunga laga hisap te, etu bimar ola nimitey pura puri 47,269 gahori murisey aro etu majotey 25,182 gahori ke tu etu bimar feilibole para rokhabole nimitey moraidisey.
Rajya te etu bimar laga dangor asar huwa ke highlight kurikina, Lalsawivunga para koisey ki etu ASF bimar ola para Mizoram te 19,017 parivar biya para affect hoisey. Aro poisa bisi loss hoikina rajya laga economy ke biya kuridisey.
Etu bimari ke feilibole para rokhabole nimitey bisi kosis kora laga bawajut bi Mizoram para etu ke rokhabole nakamyab hoisey koikina etu minister para koisey. Hoilebi, tai para biswas dilaisey ki etu situation tu etya control te asey. Mizoram te dusra rajya para gahori ana tu ban kuridisey.
Etu African Swine Fever(ASF) tu first 2021 te Bangladesh border osor te thaka South Mizoram laga Lunglei district te olaisiley. Official khan para etu bimar ola laga zimidar tu osor desh, khas kurikina Bangladesh para gahori laga gair kanooni import kora te lagaisey.
