Agencies, 04 July: Sushant Singh Rajput aro Ankita Lokhande laga popular TV show, Pavitra Rishta opor te fans khan toh etu show aro korabo na nakorabo internet te pura puzzle te ase. Khobor pheli thaka hisab te, titled Pavitra Rishta 2.0 te Ankita Lokhande toh show te tai laga role Archana hisab te korai ahibole ase aro Shaheer Sheikh toh late Sushant Singh Rajput laga role Manav hisab te lobole ase khobor phela hisab te. Hoilebe show bona khan etu opor te jip-jup thaki ase aro etu opor te be eku official confirmation toh deya nai.
Friday te ketiya photo lowa khan para actor Ankita ke tai laga khor pahar te lok korise, tai khan para show opor te tai ke hota thakise. Ankita ke toh tai sequel opor te excite ase na nai aro tai Pavitra Rishta 2.0 te late co-star SSR ke miss koribo nai hota thakise. Etu te actress para tai sequel te excite howa janaishe hoilebe tai second question te jawab nadiya thakise. Ankita para photographer ke “Chotu bade ho jaao (grow up, Chotu)” koise aro tai laga car te ja thakise.
Late Sushant Singh Rajput toh tai laga career ekta television actor hisab te suru howa thakise aro etu bechite tai Bollywood te popular howa thakise. Ekta Kapoor para Sushant ke toh Balaji daily soap Kis Desh Mein Hai Meraa Dil te actor hisab te suru kora thakise. Etu bechite tai Balaji soap te Manav Deshmukh hisab te popular howa thakise.
Ankita be deri hoikena films te tai laga rasta bona thakise. 2019 te tai para tai laga film career Jhalkaribai hisab te suru kora thakise historical periodic movie Manikarnika: The Queen of Jhansi te. Etu bechite tai 2020 action thriller Baaghi 3 te ola thakise aro etu film toh Ahmed Khan para direct kora thakise.
Add Comment