Itanagar, February 12 : Kokborok exam script laga charcha chuli thaka majotey, Tripura sarkar tu Tiprasa student khan ke Kokborok, Roman script nohoilebi Bangla bhasa aro script te exam likhibole laga choice allowed kuribole laga faisla loisey. Etu announcement tu exam laga process te bhasa shamil kuribole aro fair(nyay) kuribole nimitey dangor protest aro demand kora picheyte ahisey.
Etu mamla tu titya dangor hoisey jitya student khan para Tripura Board of Secondary Education (TBSE) para tribal student khan ke Kokborok bhasa laga paper Roman Script te answer kuribole mana kuridiya disey. Etu faisla para Tripura laga Indigeneous community majotey gusa uthaidisey. Aro etu picheyte protest aro action lobole demand kora suru hoisey.
Etu mamla ke social media te address kurikina, Tripura laga rajneetik party TIPRA Motha laga founder aro former Chairman Pradyot Bikram Manikya Debbarma para etu mamla ke online te address kurikina manu khan ke ekjut khara huwa nimitey dhanyabad jataisey. Aro koisey ki government para status quo(etya chulithaka situation) ke maintain kuribole laga faisla luwa tu ahibole thaka generation khan nimitey ekta jeet asey.
Tripura laga sarkar para etu clarify kurisey ki Tiprasa student khan logotey Roman script nohoile Nagla script duita para ekta te exam likhibole option dibo. Aro kun student bi ekta script te likhibole pressure thaka mehsoos nukuribo lagey.
Government laga faisla laga jawab te, Tipra Indigeneous Students Federation (TISF), Tipra Motha Party (TMP) para olop homoi karney jaruri national highway aro rail laga rasta block kuribole laga plan announce kurisiley.
Tripura government laga etu faisla ke swagat kurikina, Pradyot Bikram Manikya Debbarma para permanent solution laga jarurat janaisey. Aro Tiprasa community laga linguistic(bhasa) identity laga raksa kuribole nimitey likhikina assurance diya laga jarurat janaisey.
Add Comment