SEOUL:Tuesday te North Korean aro Chinese state media khobor kurishe North Korea leader Kim Jong Un toh President Xi Jinping logote fourth summit meeting kuribole China te ahi kena ase.
State para chola Korea Central Television khobor kurishe Kim aro tai laga maiki Ri Sol Ju toh China aha Thursday tok thakibo. Kim aro tai laga maiki Ri Sol Ju ke President Xi Jinping para invite kurishe.
President Xi logote summit toh Kim aro President Donald Trump laga kotha pichet hoishe. Kim aro President Donald Tromp toh second summit meeting laga location opor te negotiate kuri ase. Olop samay agote South Korea laga Yonhap news agency khobor kurishe North Korean train te bhuki kena thaka senior official loi kena China laga border cross kurishe. Tai khan toh Chinese border city Dandong toh 10:15 p.m(local time) majote cross kurishe.
Yonhap laga khobor hesab te bishi security vehicles aro officials khan train pass nokora agote Dandong railway station rasta block kuirshe. Train par kora pichete block kora rasta khan toh khuli dishe.
Sunday te Trump reporters khan ke koishe Kim logote second summit location nimite negotiations kuri ase. Aro etu hafta agote Trump koishe taike Kim para dangor letter daishe. Monday te South Korean newspaper Munhwa Ilbo khobor kurishe ke State Department officials khan North Korean counterparts khan logote multiple times lok paishe koishe. Etu meeting toh Hanoi te summit nimite hoishe. Khobor pa hesab te Vietnam para etu event toh host kuribo pare koishe.
Sunday te Trump para White House te reporters khan ke koishe Ami khan event location toh negotiate kuri ase. BBC kobor hesab te Trump koishe Event location toh bishi deri nohoi kena announce kuiribo ase koishe.
Trump koishe tai khan North Korea logote bishi bhal para kotha kuribo parishe. Trump koishe tai indirectly Kim logote kotha kuribo parishe.
Korea Central Television khobor hesab te Kim laga China trip te, Kim ke senior officials Kim Yong Chol aro Ri Yong Ho para accompany kurishe. Kim Yong Chol toh Central Committee of the Workers Party laga Vice Chairman ase aro Ri Yong Ho toh senior diplomat ase.
Kim laga visit toh China Central Television para confirm kurishe.
Add Comment