Naga Talks: GoI para NNPGs logode meeting lobo

Kohima, 24 October: Thursday din New Delhi deh Government of India aro NSCN-IM majode kaam laga kotha kora toh kothom howah nai.

Official khobor hisaab deh, tuita parties toh tin khonda para be meeting lowah thakishe. Hoilebe meeting deh kotha kora toh kothom kuribole paranai. Hoilebe ahibole olob din bechide NSCN IM logode next meeting lobole ase.

Governor RN Ravi toh interlocutor be hoi. Tai logode meeting lowah time deh NSCN-IM laga 15-member delegation toh tai khan majode indoor meeting loi ase koikena janaishe.

NSCN-IM para 15-member delegation deh Ato Kilonser TH.Muivah, NSCN-IM general secretary para led korikena Thursday din New Delhi deh meeting lowah deh thakishe.

Government of India be 25^th October, 2019 deh Naga National Political Groups (NNPGs) logode meeting lobole ase.

Council of Nagalim Churches para October 23 direk etu kotha kora toh phal result olabo nemide fasting aro prayers lowah thakishe.

Alak alak civil society organisations aro students’ unions para be political talks deh namelaideya nemide kushi napowah janaishe. Political talks deh meli kena thaga khan toh Naga Students’ Federation (NSF) , Naga Hoho, Naga Mothers’ Association, Naga Students Federation aro Naga People’s Movement for Human Rights ase.

NSF para Wednesday din Prime Minister, Narendra Modi ke memorandum deya thakishe. Etu memorandum deh unique Naga identity toh Naga national flag para recognised kuribo lakae koikena demand kora thakishe.

Nagaland deh security situation toh othise. Security forces, State Police, District Administration nesana khan toh ektum high alert deh ase. Etu agae deh state government para spb police personnel ke leave cancel kora thakishe. Kelay koile state deh law and order toh beya hobo naki bhoi para.

Etu agae deh state government para sob district administrators ke nejor laga station deh thakibole aro kebah keni situation nemide ektum hosiyar thakibole janaideya thakishe.