Aizawl, December 6 : Mizoram laga sarkar Hari Babu Kambhampati para Zoram People’s Movement laga leader Lalduhoma ke December 6 te Mizoram laga nutun Chief Minister hobole laga appointment letter disey.
Lalduhoma para Mizoram te sarkar banabole laga haak jatabole nimitey governor Hari Babu ke lok kurisey.
ZPM chief Lalduhoma tu Mizoram te eman bisi vote paikina jita picheyte Zoramthanga laga jaga loikina Mizoram laga Chief Minister hobole asey.
Tai para koisey ki rajya laga youth khan tu Mizo National Front (MNF) ke alchi lagi jaisey aro nutun idea aro nyom anikina shashan te bodli anibole mon thakisey. Lalduhoma para jitiya nimitey khusi janaisey aro etu jeet laga karon tu Isor laga asirvad aro manu khan asey koisey. Tai para koisey ki public para taikey juwa saal para hey taikhan laga leader chuniloisey aro taikey Chief Minister banabole rukhi thakisey. Tai para koisey ki etu nutun sarkar para taikhan laga 45 department te thaka bisi alag alag mamla khan te dhyan dibo.
Lalduhoma para Chief Minister huwa laga kosom kha ceremony picheyte sarkar laga top priority khan announce kuribole nimitey ekta press-conference rakhibole plan kuri asey. ZPM para Tuesday din te ekta special worship service rakhikina taikhan laga jeet manaisey. Nutun elect huwa ZPM MLA, Baryl Vanneihsangi kun etu service te mojud thakisey tai para tailaga jeet tu tailaga community laga maiki khan ke dedicate kurisey.
