Guwahati, February 14 : Congress party laga Assam unit para ahibole thaka Lok Sabha election nimitey rajya laga 5ta maan jaga laga candidate finalise kurisey.
Etu tu Assam Congress president Bhupen Borah para confirm kurisey.
Northeast rajya Assam te pura puri 14 Lok Sabha constituency(matlab Lok Sabha election nimitey voting hobole thaka jaga) asey.
Congress para etu 14 seat majotey 5ta seat te taikhan laga candidate finalise kurisey. Aro taikhan para baki 9ta seat para United Opposition Forum Assam (UOFA) nimitey kunba seat charibole akha kuri asey.
Assam Congress Chief Bhupen Borah para koisey, “Amikhan para etu 14 jaga nimitey 70 opor application paisey. Amikhan laga screening committee para 5ta jaga nimitey ekta ekta candidate identify kurisey.”
Tai para enaka bi koisey, “ Baki 9ta jaga nimitey duita-duita candidate asey. Aro etu khan majotey kunba ke amikhan laga UOFA partner te allocate kuridibo.”
Assam laga Congress president para agey barikina koisey ki rajya laga baki 9ta jaga laga candidate ke loikina akhri faisla tu February 20 tak te lobo.
Ageyte, Aam Admi Party (AAP), kun UOFA constituents majotey ekta asey, taikhan para 3ta Lok Sabha election laga voting hobole thaka jaga- Dibrugarh, Guwahati aro Sonitpur nimitey candidate announce kurisiley.
Add Comment