Guwahati, February 15 : Meghalaya laga duita Lok Sabha seat bi hasil kuribole aim kurikina, National People’s Party (NPP) para dawa kurisey ki parliament te taikhan laga duita member thakisey koiley rajya te aro bisi scheme khan ahibo.
NPP laga president Marcuise N Marak para koisey ki enaka hoisey koiley rajya te central government laga scheme khan bi eku diktar napaikina aram se approve hobo.
Marak para enaka koisey, “Amikhan tu pura biswas asey ki Tura te Agatha Sangma jitibo aro akha kuri asey ki Shillong te bhal natija olabo.”
Tai para enaka bi koisey, “Chief Minister Conrad Sangma laga leadership te, NPP para Meghalaya te bodli anibole nimitey mehnat kurisey aro amikhan para biswas kuri asey ki Delhi te NPP laga duita MP(Member of Parliament) thakisey koiley manu khan laga bhalayai nimitey thaka central scheme khan tu rajya te aram se anibole paribo.”
Agatha Sangma para poila te Tura laga MP thaka homoitey eku action luwanai koikina tailaga khilaf te iljam laga para taikey defend kurisey.
Agatha ke defend kurikina Marcuise N Marak para koisey ki tai para bisi dangor kaam kurisey. Aro koilsey ki Agatha para school building aro alag alag central scheme hna nimitey funds(poisa) pabole modod kurisey.
Agatha Sangma para Citizenship Amendment Act (CAA) ke support kora laga sawal te jawab dikina Marak para koisey bisi safayi nidikina etu laga importance ke kom kuridisey.
Add Comment