Assam laga Ashmita Chaliha para Badminton Asia Team Championships te world number 1 khilari ke haraidisey

Guwahati, February 18 : Assam laga rising badminton star Ashmita Chaliha para duniya laga number 1 player, Japan laga  Nozomi Okuhara ke February 17 te huwa Badminton Asia Team Championships te haraidisey. Tailaga teammate, Anmol Kharb logotey milikina Chaliha para India ke ekta etihasik jeet dilaisey, 

Former(poila laga) world champion Okuhara ke lagatar duita set te 21-17, 21-14 score kurikina India ke jitaisey. Ashmita laga teammate Anmol Kharb para Japan laga Natsuki ke final match te 21-14, 21-18 score kurikina asurit kuridikina jeet ke duiguna baraidisey. Aro enaka kurikina India nimitey championship hasil kurisey. 

Ashmita Chaliha aro Anmol Kharb laga ekdam bhal performance dikhikina bisi manu khan para taikhan laga naam uccha kurisey. Assam laga Chief Minister Himanta Biswa Sarma para bi social media te etu duijun badminton players ke badhai disey. CM Sarma para X te enaka post kurisey, “Indian Women’s Badminton Team nimitey ekta eman dangor achievement asey! Ashmita Chaliha aro Anmol Kharm ke top-rank te thaka opponent laga against te ekdam dangor jeet hasil kora nimitey badhai.”