Imphal, February 19 : Manipur laga police para Sunday (Feb 19) te, ban hoikina thaka Kangleipak Communist Party (KCP-Noyon) laga ekjun active cadre ke arrest kurisey.
Etu arrest huwa manu laga naam tu Leisangthem Naobi (dusra naam Yogen Meitei) thakisey. Tailaga umar tu 31 years asey. Tai tu olop din ageyte huwa kidnapping, extortion campaign aro manu laga property ke kapja kora laga mamla te shamil thakisey.
Police para Naobi ke Imphal-East district laga Khuman Pali road te ekta luka jaga para dhurisey. Taikhan para duita mobile phone, Rs 73,100 cash aro ekta registration number nathaka chor huwa gari seize kurisey.
Police para Naobi ke February 14 te 3jun manu – Md Alimuddin, Md Abdul Latif Tampakmayum aro Mairemban Johnson ke Bishnupur District laga Phubala jaga para uthaikina loija laga mamla te link kurisey.
Tai tu juwa olop moina para manu khan ke dhomki dikina poisa loi thakisey. Khas kurikina Imphal seher te.
Naobi para etu 3jun manu ke kidnap kurikina loija picheyte, southern Manipur te public para awas utha para, police khan raid aro investigation kurisey.
Naobi ke dhora picheyte, police para Naobi laga sathi khan ke bisara suru hoisey.
Taikey judicial custody te pathaidisey.
Add Comment