Akshay Kumar’s Laxmmi Bomb ‘Laxmii’ te botli hoishe

New Delhi: October 30, 2020. Akshay Kumar laga ahiboli thaka film Laxmmi Bomb nam toh Laxmii te botli hoishe. “Notun nam: Laxmii’ thakibo, koikena trade analyst Taran Adarsh para Thursday din khobor toh janai thishe. Khobor para koishe ke, Hindu manuh khan para Laxmmi Bomb nam oper te kelaaf kora nemite film bona manuh para nam toh botli korishe. Etu nam toh botnam ase aro Goddess Laxmi logot be insult ase koishe. Karni Sena para film bona director Raghava Lawrence logot Court chite thishe aro nam toh botli koriboli koishe. Media khobor hesab te, Thursday din  Laxmmi Bomb certificate bonaishe aro Central Board of Film Certification (CBFC) logot kotha korishe, etu samay film bona manuh khan para nam toh Laxmii te botli hoboli fesla loishe. Akshay Kumar para etu film te maiki ghost neshina olabo koishe. Laxmii  film toh  May 22 te release hoboli thaka coronavirus nemite thiri korishe. Hoilibe, Diwali (November 9) din Disney+Hotstar te release koribo koishe.