Assam: Congress aro AIUDF alag-alag hoishe

GUWAHATI: Assam Congress para state Assembly seats kali thaka te by-elections loboli samai AIUDF logot alak hoboli fesla korishe. Assam Congress para AIUDF logot melikena thaka toh alak hobo koikena koishe ke, “AIUDF leaderships khan para BJP party aro Chief Minister ke motob kori thaka nemite Congress party ke public para bapana beya korishe.” Assam Congress para koishe ke, “Mahajot alliance partner AIUDF’s laga neum aro bapana BJP party logot melikena thaka nemite Congress party laga member ke bapana alak koriboli olaishe.” Assam Pradesh Congress Committee laga Core Commiittee members logot besi deri kotha kora beche AIUDF para alliance Mahajot logot partner nahoboli fesla loishe,” koikena Assam Congress para janaishe. Etu fesla toh Assam Congress laga core committee meeting samai loishe aro etu Monday din Assembly House, Dispur te party’s Legislative room te thakishe. Meeting toh Assam Congress chief Bhupen Borah para chaired korishe aro State laga top party leaders aro opposition leader Debabrata Saikia, MLA Rakibul Hussain aro MP Gaurav Gogoi samil thakishe. By-elections toh 5 Assam Assembly seats te manuh mori-jowa aro legislators khan resign hoikena thaka nemite loboli ase koishe. 5 Assam Assembly seats nemite By-polls toh etu saal kotom howa samai thakiboli ase. Etu samai, Assam Congress laga core committee meeting te state te 6 indigenous communities nemite ST status demand koriboli kotha be koishe. Jodi state te 6 indigenous communities logot BJP-led Central government para ST status deya nai koile, protest thakiboli fesla loishe. Assam Congress para aro state government logot putnam thishe ke, state te maiki manuh oper te crimes besi hoi thaka aro law aro order beya thaka nemite be kotha koishe. Dima Hasao te pithor manuh khan para truck drivers ke din te morai deya aro student maiki ek jun Nandita Saikia, Dhemaji te dao para morai deya te government para law aro order control koriboli ke komjur ase,” koikena Assam Congress para janaishe. Assam congress para aro koishe ke, BJP government samai maiki manuh khan toh safe nai. Jowa 3 saal pithor te Assam toh desh te maiki manuh laga crime cases te 1^st position te ase aro etu state manuh nemite besi surom laga kotha ase” koikena junaishe.