Guwahati, February 13 : Assam laga Chief Minister Himanta Biswa Sarma para Tuesday din te Assembly te jor dikina koisey ki Assam nimitey population bisi thaka tu ekta bimari asey. Kuntu para alag alag area te taikhan laga performance ke asar kuri asey.
Tai para etu bi koisey ki desh bhor laga cleanliness(safa safi thaka) survey te etu rajya laga performance biya thaka tu sarkar nohoikina rajya laga manu khan ke reflect kuri asey.
State Budget te ekta discussion te bhak loikina, Sarma para koisey ki percentage hisap te, etu rajya laga performance tu Arunachal Pradesh nohoilebi Meghalaya logotey compare kuribole napara laga asey. Aro etu duita rajya laga population tu Assam para bisi komti asey.
Tai para opposition Congress MLA Bharat Chandra Narah ke refer kurikina enaka koisey, “ Amikhan laga population burden para percentage hisap te amikhan laga performance ke affect kuri asey. Student khan laga population para percentage ke determine korey.”Aro koisey ki Assam laga gross enrolment ratio (GER) tu pura desh laga average para bi bisi komti thakisey.
Narah para Chief Minister laga ageyte kotha kora homoitey koisey ki nutun survey ola hisap te, Assam laga GER(higher education te enroll huwa student khan) tu 16.9% thakisey. Aro desh laga average tu 27.1% asey.
Baki sob North Eastern rajya laga percentage tu Assam laga percentage para behtar asey. Aro kunba khan tu national average para bi behtar perform kuri asey.
Congress MLA laga statement te jawab dikina, Sarma para enaka koisey, “Amikhan para etu bimari ke hamla kuribo lagey aro amikhan laga bimari tu population asey.”
Tai para GER laga national survey te alag alag level te college khan bhak luwa tu bisi komti thakisey aro etu para rajya laga position ke biya para asar kurisey koikina koisey.
Etu opor te tai para enaka bi koisey, “Etu bar, sob manu para higher education survey te bhal para perform kurisey aro jitya aha saal amikhan laga result olabo, amikhan tu 23-24 percent te thakibo kuntu tu national average laga osor asey.
Tai para koisey, “Poila te 130 college laga data collect kora tu upload bi koranai. Ami para juwa kali laga agey din te 350 college laga principal logotey ekta meeting rakhisey.”
Etu CM para enaka bi koisey ki rajya te college khan laga kami nathaka hoisey. Aro kunba nutun khula college te student khan laga kami asey. Etu nimitey, amikhan laga budget te nutun scheme olaisey taki jawan manu khan ke higher studies kuribole encourage kuribo paribo. Amikhan tu rajya laga etu problem ke loikina aware asey aro etu laga jawab tu etu budget asey.”
Guwahati para Swachh Survekshan 2024 te biya para perform kora laga mamla te, CM Himanta para koisey ki etu mamla ke sabole nimitey ekta thik thak citizen movement laga jarurat asey.
Add Comment