Guwahati, February 13 : Agriculture Minister Atul Bora para Assam laga state fruit officially declare kurisey. Etu announcement kuntu ke Assembly House laga floor te kurisey, etu para janaisey ki etya Assam laga state fruit tu “Limbu” asey kuntu ke Kaji Nemu koi.
‘Limbu’ ke etu honor dibole laga faisla te kunba manu khan monjuri janaisey aro kunba khan tu monjur nathaka janaisey. Bisi manu khan tu Assam laga state fruit ki asey etu janikina nathaka nisna asey. Hoilebi etu announcement kora picheyte manu khan tu janikina thakibo. Minister Bora para Assam laga national fruit declare kora para khali rajya laga kheti bari laga heritage ke majboot bana ekla nohoikina rajya bhitor te Limbu kheti kora laga jarurat bi highlight kurisey.
Etu announcement kora homoitey, Minister Bora para limbu laga medicinal(dawai thaka) khubi aro agriculture importance bi janaisey.
Assam te 15.90 hectare matti tu limbu laga kheti kuribole nimitey dedicate kurisey. Limbu tu Assam laga agricultural landscape te bisi dangor role nibhai. Agey barikina etu janaisey ki Assam te uga limbu, total 70,000 limbu ke dusra desh te supply kuridisey.
Assam laga Chief Minister Himanta Biswa Sarma para Twitter (X) te enaka announce kurisey, “Amikhan laga sarkar para Kaji Nemu (Citrus Lemon) ke Assam laga State Fruit declare kuribole faisla kurisey. Etu laga ekdam alag smell aro antioxidant khubi para Assam laga limbu para amikhan laga local khana ke behtar banaidisey.”
Aji laga etu announcement aha picheyte, Assam laga limbu tu duniya laga fruit map te shine kuribole tayar asey.
Add Comment