Peru, 22 April : Indian shooters ISSF World Cup te tisra position te finish korise, jitu final day Lima (Peru) te hoise. Trap mixed team event te Prithviraj Tondaiman aru Pragati Dubey medal round te pahonchiboley parianai.
Simranpreet Kaur Brar Monday din women’s 25m pistol event te India laga last medal loi aise, aru itu te India laga total medal hoise 7 — duta gold, charita silver aru ekta bronze.
USA bhi total 7 medal loi aise, kintu taikan laga gold beshi thaka karone India ke pisot rakhi second place loi jabo parise. China top position te finish korise with 4 gold, 3 silver aru 6 bronze medal.
India laga standout performer hoise 18 saal laga Suruchi Inder Singh, juntu duta gold medal jiti loise.
Tai Paris Olympics double medallist Manu Bhaker ke harai 10m air pistol title jiti loise, aru pisot Saurabh Chaudhary logot team up kori mixed team event te bhi gold loi aise.
Trap mixed team event Monday din, Tondaiman aru Dubey milaike 134 score kori eighth position te finish korise. Dusra Indian pair, Lakshay aru Neeru, 128 score loi 13th position te finish korise. Medal round te jabo karone top 4 team he qualify korise.
Add Comment