Aizawl, February 21 : Mizoram NGO Coordination Committee (NGOCC) para Wednesday(February 21) te India-Myanmar border te fencing dhala aro etu duita desh majotey Free Movement Regime(FMR) khotom kuridiya ke oppose kurikina ekta dangor protest rakhisey.
Etu protest tu Mizo Zirlai Pawl (MZP) president H Lallthianghlima para NGOCC secretary Prof Malsawmliana logotey milikina kurisey.
Protest kora homoitey, Mizoram NGO Coordination Committee (NGOCC) para bi etu koikina ekta resolution pass kurisey, “Government of India para Free Movement Regime (FMR) hataidibole aro India-Myanmar border bon kuridibole kosis kora tu swikar kuribole napara laga asey.”
Etu organization para enaka bi koisey “NGOCC para Free Movement Regime (FMR) ke wapas anibole aro India-Myanmar Border fencing cancel kuribole kosis kora ke taikha tu ekdam support kuribo.”
February 13 te, Mizoram NGO Coordination Committee (NGOCC) para Central YMA Committee Room te ekta meeting rakhisey, kotey taikhan para India-Myanmar border ke bon kuridiya aro Free Movement Regime (FMR) ke hataidibole laga faisla laga khilaf te ekta protest organize kuribole faisla kurisey.
Etu NGO Coordination Committee te bisi non-governmental organizationaro naam dangor thaka group jaiseki Central Young Mizo Association (CYMA), Mizo Students’ Union (MSU), Mizo Zirlai Pawl (MZP), MHIP (Mizo Women;s Front) aro MUP (Mizo Elders Association) asey.
Add Comment