Pughoboto, January 27: Minister for R&B Y. Vikheho Swu pora 26th January 2017, Pughoboto te provisional HSLC Examination center laga inauguration kori dishe. Eitu programme te ADC Pughoboto & School Managing Chairman GHS Pughoboto, Avelü Ruho bi ahikene thakishe.
Occasion te kotha korikene Vikheho pora koise, homoi (time) aru economy ke save koribole karone eitu Exam centre ke khuli diya ase aru eitu ekla nahoikene Pughoboto laga naam bi bhal banai dibole karone ase aru achievements pabole toh teachers, students aru parents laga opor te depend korikene thakibo. Eitu school ke revive koribole karone monn lagaikene kaam korikene thaka ADC aru concern officers khan ke bi Minister pora khusi paishe koikene janai dikene thakishe. Tai pora koise, Pughoboto manuh khan etiya pora dusra khan logot lobole aru expect koribole laga bhabana ke charidibole laga homoi ahishe aru etiya toh tai khan societyke tai khan laga services contribute koribole lagibo.
Tai pora students laga pohila batch ke sincere thakikene bhal pora study koribi aru school laga naam dangor koribi koikene encourage korishe.
Aru judi konuba students top 20 te olaikene thakishe koile tai khan karone incentive bi dibo koikene Minister pora announce korikene thakishe.
ADC Pughoboto Avelü Ruho pora welcomed address korikene thakishe aru tai pora education aru development laga kotha korikene thakishe. Minister R&B pora students khan karone bhabana kori dikene thaka karone Ruho pora bisi thanks ase koikene janai dikene thakishe. NBSE pora bi necessary action loikene thaka karone tai pora tarif (laud) korikene thakishe.
Aphuyemi Hobo, President Inavi Swu pora speech present korikene thakishe aru tai pora SDPDB, NBSE aru Education Department ke thanks janai dikene thakishe. Occasion te SAKK President aru PATC Vice Chairman pora bi kotha korikene thakishe.
Head Mistress GHS, Pughoboto Yhunyule Kent pora eitu programme ke chair korishe aru SDEO Pughoboto, Watisangla pora vote of thanks dishe.
Add Comment