Imphal, February 21 : Manipur government para Churachandpur district te, aro extra 5 din nimitey internet service suspend kuribole faisla loisey.
Manipur laga Churachandpur district te internet bon kurikina thaka tu aro olop din nimitey baraidiya laga karon tu tatey nyom aro beybosta laga diktar chuli thaka nimitey asey.
Etu janibo lagey ki Manipur laga Churachandpur district te ajikali bhitor te dangor larayi jhagra huwa dikhisey. Aro etu larayi jhagra tu ekjun police officer laga against te action luwa nimitey olaisey.
Manipur Chief secretary Vineet Joshi para issue kora ekta order te enaka koisey, “Churachandpur district te etya chuli thaka kanoon aro beybosta laga situation ke review kora picheyte, state government para Churachandpur district laga pura revenue jurisdiction te internet service aro VPN service bon kurikina rakha tu continue kuribole faisla kurisey.
Mobile service provide kora khan ke etu order ke manikina chulibole instruction disey.
Etu internet service bon kora laga tarik baraidiya tu February 16 te olop din nimitey Internet service ke bon kuribole laga order issue kora picheyte hoisey.
Manipur laga Churachandpur district te etu larayi jhagra tu February 15 te suru hoisey jitya ekta phir para superintendent of police aro deputy commissioner laga office thaka ekta government complex te joborjosti gusisey. Etu ghotna te security forces khan para firing kora picheyte duijun manu murisey aro 30 manu jokhom khaisey.
Etu ghotna tu ekjun head constable ke ekta video te hathyar bukhikina thaka manu khan logotey dikha picheyte tailaga naukri para suspend kuridiya picheyte olaisey.
Protest kora mnau khan para suspend huwa head constable ke tailaga position te wapas dhalibole demand kuri asey. Aro etu dawa kuri asey ki tailaga suspension tu na-insaafi thakisey .
Add Comment