January 21: Manipur laga journalist ekjun ke National Security Act (NSA ) laga nije te pora thoriya laga ek mohoina bicche te, All India Congress Committee (AICC) chief Rahul Gandhi pora Kishore Chandra Wangkhem ke Imphal te thori kena rakhiya ke besi bodnam koriya khota koise.
Thori kena thakiya Manipuri journalist ke lekhiya chitti te Rahul pora lekhise ki, “Mon khusi napowa ke chup koribo karne etu toh state laga kam ekta ase. Etu olop mohoina bithor te moi khan pora dekhise ki, BJP government pora Manipur manu khan laga rights ke jabai diya toh,” Gandhi pora journalist ke lekhiya chitti te tai enika koise. Wangkhem (39), kono Imphal laga local channel te anchor thakise, ke NSA laga nije te ek-saal karne December mohoina te thorise, Etu toh tai ke November 27 te state aro centre laga BJP government aro Prime Minister Narendra Modi ke Facebook post te bodnam koriya karne thoriya laga ek mohoina laga osor bicche te ase.
“Etu toh gopal biya ase ki biccha rasta jabo mon khan pora etu harkat koriye aro awaaz olai etu manu khan ke thoriye. Fascist(doosra manu laga phabana ke na maaniya) khan pora toh India laga asol maksat ke biya kora ekla nahoi hoilebi kono bi tai khan laga biya phabana ke sawal koriya ke hamla koriye”, etu Congress chief pora lekhise aro thoriya journalist ke support dibole wada korise.
The Hindustan Times pora kobhor korise ki Wangkhem laga maiki Elangbam Ranjita, pora koise ki etu chitti toh tai ke TN Haokip, Congress Manipur unit laga president pora Friday te dise. Party laga haat pora support bi dibo koikena koise.
“Moi Rahul Gandhi ke dhanyabad dibo mon ase kile koile tai etu chitti lekhise aro etu galdi logot khilaf khara korise. Etu toh phabana te bi thakiya nai. Etu toh political party laga khota nahoi hoilebi etu toh tai manu nimite khara korise,” Ranjita pora koise.
“Kon pora bi kenika nijor laga phabana khota kowa karne NSA dibo paribo?” tai enika sawal korise.
Manipur government pora pohoila koise ki Wangkhem ke aage te November 27 te thoriya toh, “tai State laga security nimite aro harkat kora pora rukhaibole aro public order thik rakhibo karne ase”. Etu toh facebook video te tai pora Chief Minister N Biren Singh aro Prime Minister Modi ke bodnam koriya bicche te ase.
Etu video te, etu journalist pora koise ki chief minister toh Modi laga “putli” ase aro RSS ke Jhansi laga Rani Lakshmibai laga jonam din laga deyohar manaibole function organize koriya pora bodnam korise. Wangkhem pora koise ki Jhansi laga Rani toh Manipur logot eku lobo-dibole nai.
Add Comment